నా అనుభవం – నేర్చుకొన్న పాఠం

అర్జునుడు.. మిస్టర్ డేనీ ఓషన్..

Posted on ఆగస్ట్ 31, 2013. Filed under: నా అనుభవం - నేర్చుకొన్న పాఠం, వ్యక్తిత్వ వికాసం | ట్యాగులు:, , , , , , |

మహా భారతంలోని మన అర్జునుడికి, హాలివుడ్ చలన చిత్రం Ocean’s Eleven లోని డేనీ ఓషన్, వీరిరువురికి ఒక సమానత వున్నది. అది లక్ష్యంపై చెదరని దృష్టి.

గురువు చెట్టుపై వేలాడదీసిన పక్షి బొమ్మ యొక్క కన్ను లక్ష్యమని చెప్పి, దాన్ని బాణంతో ఛేదించమంటే, శిష్యులందరిలో ఒక్కొకరికి ఆ పక్షి కన్నుతో పాటు పక్షి శరీరం, చెట్టు కొమ్మలు, ఆకాశం ఇంకా ఎన్నెన్నో కనిపించాయి. కానీ అర్జునుడికి మాత్రం ఆ పక్షి కన్ను మాత్రమే కనిపించింది. అతని దృష్టి పక్షి కన్నుపై కాకుండా, మరే దాని మీదకు మారలేదు. గురువు సెలవిచ్చిన లక్ష్యాన్ని ఛేదించగలిగాడు.

Ocean’s Eleven లోని ఒక సన్నివేశం. బెనిడిక్ట్ ను దోచుకోవాలని నిశ్చయించుకున్న ఓషన్, అతని ప్రతి కదలికను అనుసరిస్తూ వుంటాడు. బెనిడిక్ట్ లాస్ వేగాస్ లోని తనకు చెందిన ఒక పాత హోటల్ భవంతిని కూల్చి, దాని స్థలంలో ఒక క్రొత్త భవంతిని కట్టడానికి నిర్ణయించి, దాన్నిబాంబులతో కూల్చేటప్పుడు, భవంతి ఎదుట ఒక బహిరంగ సభ ఏర్పాటు చేస్తాడు. బెనిడిక్ట్ ఆ సభలో రంగస్తలంపై నిల్చోని వుంటాడు. ఆ సభలో ఓషన్ మరియు, ఓషన్ కదలికలను మర్మంగా కనిపెడుతున్న అతని బృంద సభ్యుడు లినస్ కూడా వుంటారు. బాంబును పేల్చడానికి ట్రిగర్ ను నొక్కిన క్షణంలో, సభలోని అందరూ కూలుతున్న భవంతిని చూడడానికి వెన్నకి తలలు తిప్పుతారు, కానీ ఓషన్ మరియు లినస్ ల చూపులు మాత్రం మరలదు. ఓషన్ చూపు బెనిడిక్ట్ పై మరియు లినస్ చూపు ఓషన్ పై అలాగే వుంటుంది. చలించని దృష్టి అంటే అది. చిత్రం చివర సన్నివేశంలో ఓషన్ మరియు బృందం బెనిడిక్ట్ ను నిలువునా దోచుకుంటారు.

లక్ష్యం పైనే పూర్తి దృష్టిని కేంద్రీకరించి, ఆ లక్ష్యాన్ని సాధించాక కలిగే తృప్తి మరియు ఆనందం, మరెందులోనూ పొందలేమనే నా భావన. కొన్ని కచ్చితమైన లక్ష్యాలను ప్రస్తుతం వుంచుకొని దాని వైపు కృషి సల్పుతున్న వారు మరియు గతంలో లక్ష్యం నెరవేర్చుకున్న వారు, నా భావనతో ఏకీభవిస్తారనే అనుకుంటున్నాను.

Read Full Post | Make a Comment ( None so far )

దాగుడుమూత

Posted on నవంబర్ 7, 2011. Filed under: నా అనుభవం - నేర్చుకొన్న పాఠం | ట్యాగులు:, , , , , , , , |

జీవితం యొక్క మొదటి దశ అయిన బాల్య ప్రాయములో మనము దాగుడుమూతల ఆట ఆడుంటాము… జీవితం యొక్క తరువాతి దశలలో, జీవితం మనతో పలు దాగుడుమూతలాట ఆడుతుంది…

జీవితం మనతో ఆడుతున్న దాగుడుమూతలాట మనకు ఇష్టమున్నను లేకున్నను.. మనము ఆ ఆటలోని భాగమే.

విద్యార్థి దశలో, ఒక వ్యక్తి కోరిన చోట చదవగలగడం, కోరిన వస్తువులను పొందగలగడం… జీవితం మనతో ఆడుతున్న దాగుడుమూత…

యవ్వనంలో వున్న వారు కోరిన వ్యక్తిని జీవిత భాగస్వామిగా పొందే తరుణము.. ఒక దాగుడుముతాటే ..

మధ్య వయస్కుడు తాను ఊహించిన విన శైలిలోనే బ్రతక గలగడం.. జీవితం మనతో ఆడే దాగుడుమూతే….

వయసు మల్లిన కాలములో, తన తరువాతి తరం వారికి అన్ని సమకూర్చాక.. వారి మధ్య వుంటూ.. మధుర జ్ఞాపకాలను నెమరువేసుకుంటూ గడపగలగడం కూడా.. జీవితం మనతో ఆడుకునే దాగుడుముట ఆటలోని భాగమే…

చిత్రకథనాలలో మలుపులు లేకుంటే, ఆ చిత్రము నీరసంగా ఎలా తయారవుతుందో.. జీవితంలో దాగుడుమూతలు లేకుండా, అన్ని ఒక పద్దతిగా, ఏదో శాసనములో తెలిపిన విధముగా సాగితే, జీవితం నీరుగారి అంతే నిరుత్సాహంగా తయారవుతుంది. జీవితము మనతొ ఆడే ఈ ఆటను ద్వేషించక, ఆటలోని మెలుకువలు మరియు కిటుకులు తెలుసుకొని, పూర్వ అనుభావాల పాఠాలు గుర్తుంచుకొని, చక్కగా ఆడితే.. గెలుపు మనదే…

అయినా అన్నీ మనము తలచిన విధముగానే సాగితే.. జీవితములో కిక్ ఏముంటుంది చెప్పండి…

Read Full Post | Make a Comment ( None so far )

ప్రతి నరుడు – ఓ నటుడు

Posted on జూలై 30, 2011. Filed under: నా అనుభవం - నేర్చుకొన్న పాఠం, నా విసుర్లు | ట్యాగులు:, , , , , |

రంగస్థలంపై నటించిన వారిని అందరు చూస్తారు. ఆ నటుల అభినయాన్ని అభిమానించేవారు వారు కొందరైతే, ఆరాధించేవారు కొందరు. వ్యాఖ్యానించేవారు కొందరైతే, ఆక్షేపణ తెలిపేవారు కొందరు. వెండితెర నటులుపై ఎన్నో రచనలు, బ్లాగులలో టపాలు వున్నాయి. వాటికి భిన్నంగా రోజూ మన చుట్టూ వుండే నిజ జీవిత నటుల గురించి ప్రస్తావించాలని నేను నిశ్చయించాను.

ఈ నిజ జీవిత నటులు ఎవరని అలోచిస్తున్నారా?! ఈ భువిపై నివసించే ప్రతి నరుడు, నటుడే. వెండితెరపై అందరు మెరవలేరు, కాని జీవితం అనే రంగస్థలంపై తమ అభినయ ఛాతుర్యాన్ని ప్రదర్శించి తళ్ళుక్కుమన్నవారు కోకొల్లలు. మన చుట్టూ వున్న వారు ఎలా నటిస్తున్నారో తెలుసుకోవడానికి ఒక్క రోజు వెచ్చించండి. ఆ ఒక్క రోజు మీ చుట్టూ జరుగుతున్న సంఘటనలను నిశితంగా గమనించండి. అప్పుడు మీకు తెలిసిన వారు, మీతో కలియతిరుగుతున్న వారు ఎలా నటిస్తున్నారో, ఎందుకు నటిస్తున్నారో తెలుస్తుంది.

అందరూ ఎల్లాప్పుడు నటించరు. నా వుద్దేశంలో నటించడం అంటే, ఒక వ్యక్తి తను తానులా ప్రవర్తించక  కాస్త లేక పూర్తి భిన్నంగా ప్రవర్తిచడం. మనకు తెలిసో తెలియకో మనము కుడా ఇటువంటి పనిని ఎన్నో మార్లు చేసి వుంటాం. ఇటువంటి నటన సబబేనా అన్న ప్రశ్నకు సమాధానం చెప్పటం ఎంతో కష్టము. ప్రతి వొకరికి, వారి కారణాలు అవసరాలు వుంటాయి. వాటిని తప్పుబట్టలేం, అలాగని ఎల్లప్పుడు స్వీకరించలేం. మనకు హాని కలగనంత వరకు, వాటిని అంగీకరిస్తాం. అలా కాని పక్షాణ, వాటికి తిరస్కరిస్తాం. మనుషుల పలు సహజమైన ప్రవర్తనలలో ఇదొకటి.

మీలోను ఒక నటుడు/నటి ఉన్న వాస్తవం మరవకండి. ఈ క్షణం నుండే మీ నటనా చాతుర్యాన్ని సానబెట్టండి.

Read Full Post | Make a Comment ( 1 so far )

గర్వ భంగం

Posted on జూన్ 30, 2011. Filed under: నా అనుభవం - నేర్చుకొన్న పాఠం | ట్యాగులు:, , , , , , |

ఒక్క విజయం దరి చేరేసరికే విర్రవీగిపోవడం సబబు కాదు. ఈ నీతి ఎప్పుడో మన పెద్దలు చెప్పినను, దాన్ని పట్టించుకోకపోవడంతో, ఒకే రోజులో రెండు మార్లు మొట్టికాయలు వేయించుకొని మరీ తెలిసుకోవలసిన పరిస్థితి నాకు కలిగింది.

ఇది నా ఒక్కడి సమస్య మాత్రమే కాదనుకుంటాను. పలువురు ఒక విజయం దక్కగానే, కళ్లు నెత్తికి ఎక్కించేసుకొనేస్తుంటారు. మరి దాని వల్ల కలిగే ప్రయోజనాలలోకి తొంగి చూస్తే గనక, అక్కడ మనకు ఏమి కనిపించదు. ఎందుకంటే, దాని వల్ల క్షణికమైన ఆనందం కలిగినను, తర్వాత అన్నీ నష్టాలే చోటుచేసుకుంటాయి. విజయం వలన వినమ్రత అలవడాలే గాని, మనలో గర్వం చోటుచేసుకోరాదు.

కలి యుగంలో, మన తప్పులకు శిక్ష వెంటనే విధించబడుతాయని ఎవరో చెప్పారు. నా విషయంలో అది ముమ్మాటికీ నిజం. ఆట పూర్తి కాకుండానే, నేను అందరికన్నా ముందు వున్నానని ప్రగల్భాలు పలికాను, చివరికి వచ్చేసరికి అందరికన్నా వెనుకబడ్డాను. గర్వంతో నాకు నేనే గోతులు తవ్వుకొని అందులో పడ్డాను. గర్వ భంగం జరిగింది.

ఇలా జరగడం వలన నేను చింతించడం లేదు, సంతోష పడుతున్నను. ఒక పాఠం, గుణపాఠం నేర్చుకున్నాను. ఈ రోజు చేసిన తప్పు, ఇంకెప్పుడూ చెయ్యను. ఈ రోజైతే వుత్త మొట్టికాయలతో సరిపోయింది. ఈ గుణపాఠం గుర్తుకు వుంచుకోకుంటే, ముందు ముందు ఏ విధంగా గర్వ భంగం జరుగుతుందో వూహిస్తే దడ పుడుతోంది.

Read Full Post | Make a Comment ( None so far )

limit దాటితే.. liver దెబ్బతింటుంది..

Posted on మే 31, 2011. Filed under: నా అనుభవం - నేర్చుకొన్న పాఠం, పెద్దల మాట - సద్ది మూట | ట్యాగులు:, , , , , , , |

శ్రుతి మించడం ఎప్పటికి పనికి రాదని నేను చాలా బాగా గ్రహించాను. అతి సర్వత్రా వ్యర్జతే అని అన్నారు పెద్దలు. కొంత మంది చేసే కొన్ని చేష్టలు కాస్త రోజులకు అందరికి ఆమోదయోగ్యం కావచు. ఆ చేష్టలను అందరు ఆస్వాదించవచ్చు. కాని అవి శ్రుతి మించినప్పుడే ఇబ్బంది కలిగిస్తాయి.

మన చేష్టలు సాటి వారికి ఇబ్బందిగాను, నష్టాన్ని కలిగించే విధముగా వుండరాదు. శ్రుతి మించి ప్రవర్తించడం వలన, సాధు జీవులు కూడా బలంగా ఎదురుతిరగడం నేను గమనించాను. కళాశాలలో నాతో విద్య అభ్యసించిన విద్యార్థి ఒకతను, తన ముక్కు మీద వున్న వాత గురించి నాకు చెప్పాడు. అతను తన చిన్నప్పుడు, ఒక కుక్కను చాకే వాడు. ఆ కుక్క ఎంత మంచిదంటే,  అస్సలు మొరగదు, కాస్త కుడా కరవదు. ఒకానొక రోజు ఆ కుక్కను ఒక గదిలో తీసుకెళ్ళి, దాన్ని రెండు కాళ్ళను పట్టుకొని గిరుమ్మని బొంగరం వలె తిరిగాడు. అలా చేసాక, దాన్ని తన చెంతకు తీసుకొని మొహంలో మొహం పెట్టి ముద్దాడపోయాడు. అప్పుడు ఆ అమాయకపు కుక్క ఇతని ముక్కును గట్టిగా కరచి పారిపోయింది. ఇతను శ్రుతి మించడం వలన కుక్కా పోయె, మొహంలో గాటు మిగిలే.

ఆ అబ్బాయి కుక్కను పోగొట్టుకున్నాడు. కాని మన రోజువారి జీవితాలలో  కొందరు శ్రుతి మీరడం మరియు అతి చేయడం ద్వారా కొన్ని బంధాలను, బంధుత్వాలను పోగొట్టుకుంటున్నారు. కొందరికి అవి అర్థమవటము లేదు. అర్థమైన అవి ఎలా ఆపు చేయాలో వారికి తెలియటము లేదు.

మన చేష్టలు శ్రుతి మీరాయి అని ఎలా కనుగొనడం? శ్రుతి మించిన క్షణాన్ని గ్రహించడం పెద్ద కష్టమేమి కాదు. మన అంతర్వాణి మనలను హెచ్చరిస్తుంది. ఎదుటి వారి హావ భావలు కూడా వాటిని తెలుపుతాయి. తప్పు చేయడం సహజం. కాని ఆ తప్పును అంగీకరించిన వాడు మనిషి. ఆ తప్పును సరిదిద్దుకొనే వాడు మహర్షి. శ్రుతి మీరుతున్నాము లేక శ్రుతి మీరాము అని గ్రహించిన వెంటనే, అ చర్యను/చేష్టను అంతటితో ఆపు చేయడం ఉత్తమం, అందరికీ శ్రేయస్కరం.

Read Full Post | Make a Comment ( None so far )

నిజం కావాలా ?!

Posted on మే 8, 2011. Filed under: నా అనుభవం - నేర్చుకొన్న పాఠం, నా విసుర్లు | ట్యాగులు:, , , |

నిజాన్ని దాయటానికి, నిజం చెప్పకపోవటానికి గల వ్యత్యాస్యం కనుగొనడం నా తరమా? ‘నిజం’ – మన జీవితాలతో బాగా పెనవేసుకుపోయిన ఒక ముఖ్యమైన వస్తువు/విలువ. నిజం మాత్రమే పలకడం కొందరి వైనం; నిజాన్ని అస్సలు బయటపెట్టక పోవటం కొందరి నైజం.

‘ అతడు ‘ చిత్రములో కథానాయకుదు ఇలా అంటాడు.. ‘ నిజం చెప్పకపొవటం అబద్దం; అబద్దాన్ని నిజం చేయాలనుకోవడం మోసం’. దీననుసారం, నిజం దాయటం ఎమని అనిపించుకుంటుంది. నానుండి నిజాన్ని దాచే ప్రయత్నం చేసారు, అసలు విషయాన్ని వక్రీకరించారు.  మెల్లగా అసలు విషయమేమిటో బయటపడసాగింది. ఇటువంటి పనిని సమర్థించుకోవడమే కాకుండా, నాతో కుడా ఈ నీచమైన (నా అనుసారం) పనికి ఒడిగట్టమని ఆదేశించారు కూడా.

కొన్నిమార్లు నిజం చెప్పకపోవటం మంచి చేస్తుందంటారు. ఇతరులకు అది మేలు చేస్తుంది అని అనుకున్నప్పుడు అబద్దమాడటంలో తప్పులేదని అంటారు. స్వలాభం కోసం అదే పని చేసేవారిని ఏమనాలి. ఎంత విచిత్రమైన పద్దతులు మనవి. సందర్భానుసారంగా విలువలను కూడా మార్చేస్తాం. ప్రాధమిక విలువలకే, వెలువలేకుండా పోతున్నది.

‘ నాకు నిజం కావాలి. నిజం మాత్రమే కావాలి ‘, అని ఆడగటం మూర్ఖత్వంగా భావింపబడుతున్న ఈ రోజులలో, అలా కోరేవారు చాలా తక్కువ, కోరినా వాటిని పొందిన వారు అతి తక్కువ. ఆ దేవుడే మనలను రక్షించు గాక.

Read Full Post | Make a Comment ( None so far )

వ్యసనానికి దూరంగా… వ్యాపకానికి దగ్గరగా…

Posted on జనవరి 20, 2011. Filed under: నా అనుభవం - నేర్చుకొన్న పాఠం, వ్యక్తిత్వ వికాసం | ట్యాగులు:, , , , , , , , , , , , , |

ఎప్పుడు ఏదో ఒక వ్యాపకం పెట్టుకొని, వాటితో కొనసాగడం మంచిది. బాధ, ఒత్తిడి, చింత, ఆవేశం వంటి మనోస్థితుల వలన మనకు నష్టం వాటిల్లే ఆస్కారమున్నది. ఆ నష్టాన్ని ఆపగలగడం కాస్త కష్టతరం కావచ్చు. సాధారణంగా కొందరు పైన పేర్కొనబడిన మనోస్థితులను తట్టుకోవడానికి వ్యసనాలకు దగ్గరవుతుంటారు. ఈ వ్యసనాలు కాస్త విశ్రాంతి, ఓదార్పును కలగచేసినా మరో రకాలుగా నష్టం వాటిల్లజేస్తుంది

ఈ విధమైన నష్టాన్ని అరికట్టాలంటే వ్యసనాన్ని వీడి, వ్యాపకాన్ని అలవరచుకోవాలి. వేధనకు గురి చేసే మనోస్థితులను వెలియబుచ్చకుండా లోపలే వుంచేసుకున్నట్లైతే, అది మనలను దెబ్బతీస్తుంది. స్యయం కృషి చలన చిత్రములో ఒకానొక సన్నివేశములో కథానాయకుడు, తను కోపానికి గురైనప్పుడు, అతని కార్యాలయములోని ఒక గదిలోనికి వెళ్ళి, తలుపులు కట్టేసుకొని, ఒంటరిగా చెప్పులు తయారుచేస్తాడు. ఆ విధముగా తన కోపాన్ని ఎవరికీ ఇబ్బంది కలగని రీతిలో వెలియబుచ్చుతాడు. వేధనకు గురి కాకుండా తనను తాను కూడా కాపాడుకుంటాడు. చెప్పులు కుట్టడం అనే వ్యాపకంతో మనఃశాంతిని పొందాడు. ఇంకా ఒక జత చెప్పులు కుడా తయారయ్యాయి.

వ్యాపకం మరియు వ్యసనానికి తేడా ఏంటి? నా ప్రకారమైతే… క్రొన్ని కారణాల రీత్యా కలుగుతున్న వేధనలను దూరం కావించుకోడానికి, మనము క్రొన్ని అలవాట్లను అలవరచుకుంటాము. అలా పుట్టుకొవచ్చిన అలవాట్లకు మనము బానిసలమైతే అది వ్యసనం. అదే ఆ అలవాట్లు మనకు బానిసలలైతే దాన్ని వ్యాపకంగా పరిగణించవచ్చు.

అందుచేత మనకు కీడు తలపెటే వ్యసనానికి దూరంగా… మనకు మేలు తలపెటే వ్యాపకానికి దగ్గరగా వుండడం శ్రేయస్కరం.

Read Full Post | Make a Comment ( 4 so far )

సంకెళ్ళు

Posted on డిసెంబర్ 11, 2010. Filed under: నా అనుభవం - నేర్చుకొన్న పాఠం | ట్యాగులు:, , , , |

కొన్ని సార్లు మనము చేస్తున్న పనులవలన లాభం చేకూరకపోవచ్చు. అప్పుడు మనకు మరెన్నో మార్గాలు కనిపించవచ్చు. ఆ మార్గాలు గుండా పయణిస్తే మనకు లాభం చేకూరవచ్చని మనలో ఏదో భాగం చెప్తున్నా మనము ఆ మార్గమును ఎంచుకోము. మనలో ఒక అఛేతనా వాణి మనలను ఆ మార్గములో సాగమని చెప్తూనే వుంటుంది. మనకు మొరపెట్టుకుంటుంది. మనతో వాదులాడుతుంది. గింజుకుంటుంది. కాని మనము ఆ మార్గమును ఎంచుకోము.

ఆ మార్గమును మనము ఎంచుకోకపోవడానికి పలు కారణాలు వుండవచ్చు :

బద్ధకము
మార్పు యొక్క భమము
అంతిమ ఫలితము మీద సందేహము
ముందుకు సాగకుండా మనలను కట్టిపడవేసే ఏదో భారము

ఈ కారణాలు మన ఎదుగుదలకు సంకెళ్ళు. క్రొత్త విధాలను అవలంభించడం, క్రొత్త పద్ధతులను పాటించడం, ముఖ్యంగా మన పనితీరులో అవసరమైన మార్పును తీసుకురావడం మనకు లాభదాయకము అని మనకు అగుపించినప్పుడు వాటిని మనము స్వాగతించాలి. మారడం వలన శిరచ్చేధన చేయబడుతుంది అని అనిపిస్తే ఆ పని చేయవద్దు. అలా కానిపక్షాన ఆ మార్పును ఎందుకు స్వీకరించరాదు?

మన పనులకు ఫలితములు అందని   … మనము మారకుండా చింతించడం మూర్ఖత్వం, అవివేకం. మన లోపాన్ని ఇతరుల మీదకు నెట్టడం, పరిస్థితులను సాకుగా చెప్పి తప్పించుకోవడం అమానుషం.

మన సంకెళ్ళను మనమే తొలగించుకోవాలి. మనకు శారీరకంగా, సామాజికంగా విధించబడిన సంకెళ్ళను ఇతరులు తొలగించగలుగుతారేమో గాని, మానసికంగా మనకు మనమే విధించికున్న సంకెళ్ళను తొలిగించడం ఇతరులకు సాధ్యం కాదు. ‘ నాది ఏమి చేయలేని పరిస్థితి ‘, ‘ నేను బంధీను ‘ అనే భావనలతో గనక మనము బ్రతికెతే ఎవ్వరూ మనలను కాపాడలేరు. చివరకు ఆ దేవుడు కూడా ఏమి చేయలేడు. మన జీవితం మన చేతులలోనే… మన చేతలలోనే ….

Read Full Post | Make a Comment ( 1 so far )

మనిషి కొరకు డబ్బు, డబ్బు కొరకు మనిషి కాదు

Posted on నవంబర్ 9, 2009. Filed under: నా అనుభవం - నేర్చుకొన్న పాఠం | ట్యాగులు:, , , , , , , , , , , , , , , , , , , |

నా గడిచిన జీవిత కాలంలో, నేను డబ్బుతో ముడిపడివున్న ఎన్నో సంఘటనలను గమనించాను. వాస్తవానికి మనకు తెలిసో తెలియకో మన జీవితమంతా డబ్బుతో, డబ్బు చేత, డబ్బు కొరకు నడుస్తున్నది. తన జీవితములో ఈ‌ సత్యాన్ని సరిగ్గా అర్థం చేసుకున్నవాడే జ్ఞాని, చేసుకోలేనివాడే అజ్ఞాని.

ఈ‌ సత్యం జీర్ణించుకోవటానికి కాస్త కష్టంగానే ఉన్నా, నిత్య జీవిత ఘటనలను నిశిధంగా పరిశీలిస్తే ఇది బాగా అర్థమవుతుంది. సూర్యుడు తూర్పున ఉదయిస్తాడనుట ఎంతటి సత్యమో, ఇది కూడా అంతే సత్యము.

మనిషి కొరకు డబ్బు కావాలి, అంతే కాని డబ్బు కోసం మనిషి కాదు.
ఈ ప్రస్తుత జగత్తులో‌ డబ్బు మనిషిని శాసిస్తున్నదనే సత్యమును బాగా అర్థం చేసుకున్నప్పుడే, మనము డబ్బును శాసించగలుగుతాము. అంటే, మనము ఎక్కువ మోతాదులో డబ్బు సంపాదించగలమని కాదు. డబ్బును కాకుండా, ఆనందాన్ని మన జీవిత లక్ష్యంగా చేసుకొనుటలో కృతార్తులవుతాము.మన జీవితం మీద పూర్తి అదుపు, మన చేతులలోకి వస్తుంది.

ఈ సత్యం తెలియనంత వరకు, మన పరిస్థితి మన జీవితములో మనము దేనికోసము వెతుకుతున్నామో తెలియకుండా, నిరంతరం వెతుకుతుండదం వంటిది. మన లక్ష్యం ఏమని తెలియకపోతే మనము దానిని ఎలా పొందగలము. మీరు అనవచ్చు, ‘లేదయ్యా! నాకు జీవిత లక్ష్యం/లక్ష్యాలు లేదని ఎందుకు అనుకుంటావు?’ అని. అవి ఇల్లు కట్టడమో, సమాజంలో హోదా/పదవులు పొందడమో, సమాజంలో గౌరవ మర్యాదలు సంపాదించడమో, ఆస్తిని సంపదను కూడగట్టటమో, సమాజ సేవ కుడా కావచ్చు. మరి ఈ లక్ష్యాలను సాధించాలని మనము ఎందుకు అనుకుంటున్నాము? ఎందుకంటే, వాటిని సాధిస్తే సంతృప్తి, సంతోషాలు కలుగుతాయని.

అంటే మనము తెలిసి/తెలియక ఏమి చేసినా, ఎన్ని చేసినా అదంతా మన  సంతోషం కోసమే. ఇది గనక మనము బాగా గుర్తుకుంచుకున్న పక్షాన వాటికి కావలసిన డబ్బును సంపాదిస్తాము. కాని, దాదాపు అందరూ ఆ డబ్బును సంపాదించే ప్రక్రియలో డబ్బుకు దాసులు అవుతున్నాము. మన అసలైన లక్ష్యమును మరచి, డబ్బే మన లక్ష్యంగా చేసుకుంటున్నాము. ఇదే మనలను తప్పుడు దారులకు వెళ్ళడానికి ప్రోత్సహిస్తున్నది, నేరములు చేయడానికి ప్రేరేపిస్తున్నది, అపకీర్తి పాలుచేస్తున్నది, మనలను బలహీనులను చేస్తున్నది, మన విచక్షణా జ్ఞానాన్ని హరింపజేస్తున్నది, ఆకరకు మన జీవితంలో సంతోషాన్నే లేకుండా చేస్తున్నది.

డబ్బు బాగా సంపాదించినా, ఏదో వెలితి, అసంతృప్తికి కారణము కూడా ఇదే. అందుకే ఈ‌ సత్యాన్ని బాగా అవగతం చేసుకుని, మనిషి కొరకు డబ్బు, డబ్బు కొరకు మనిషి కాదు అని గుర్తుంచుకోండి. ఈ‌ విషయం గుర్తుంచుకుంటే మనము జీవితంలో ఏమి కావాలన్నా సాధించగలము. ఏదైనా పని చేసేటప్పుడు కష్టాలు ఎదురైతే, ఈ పని ఎందుకు చేస్తున్నాము, దీని వలన మనకు సంతోషము కలుగుతుందా అని ప్రశ్నించుకొని తర్వాత కొనసాగాలి.

Read Full Post | Make a Comment ( 9 so far )

మీరు మిత్రులను ఎలా ఎన్నుకుంటారు? 2వ భాగం

Posted on నవంబర్ 4, 2009. Filed under: నా అనుభవం - నేర్చుకొన్న పాఠం, లోక జ్ఞానం | ట్యాగులు:, , , , , , , , , , , , , , , , , |

ఈ శీర్షికలోని మొదటి భాగంలో బాల్య మిత్రులను గురించి చెప్పుకొచ్చాను. బాల్యంలో కాకుండా తర్వాతి కాలంలో మనకు మిత్రులైన వారు నిజమైన స్నేహితులు కారా? అనే సందిగ్ధంతో ముగించాను.

Tell me who your friends are and I will tell you who you are” అనే సామెత ఒకటున్నది. ఒక మనిషి యొక్క వ్యక్తిత్వాన్ని అతని మిత్రులను బట్టి లెక్కకట్టవచ్చన్నది దీని అర్థం. అందరూ ఈ సామెతతో పూర్తిగా/పాక్షికంగా ఏకీభవించకపోవచ్చు. కాని, మన మిత్ర బృందం యొక్క ప్రభావం మాత్రం మన మీద కచ్చితంగా ఉండటం జరుగుతున్నది. మరి మన వ్యక్తిత్వం, జీవనశైలి మన మిత్రుల ఆదారంగా  ప్రభావితమవుతున్నప్పుడు, మనము స్నేహితులను ఆచితూచి జాగ్రత్తగా ఎన్నుకోవడంలో తప్పులేదని నా భావన.

మాతా పితా గురు దైవం ‘ అని అంటారు. మొదట తల్లి, తర్వాత తండ్రి, ఆ తరువాత గురువు, చిట్టచివరన దైవాన్ని ఆరాధించాలని మన పెద్దల ఉవాచ. అదే మనకు ఒక సరైన నిజమైన స్నేహితుడు గనకుంటే  అతనే మనకు లాలించే తల్లిగా, రక్షించే తండ్రిగా, దారి చూపే గురువుగా మరియు కరుణించే దైవంగా ఉంటాడు. స్నేహితుడు మనకొక అవసరం వచ్చినప్పుడు కొన్నింటికి మాత్రం ఒరిగే వ్యక్తిలా కాకుండా, మన సర్వస్వం తానై ఉంటాడు.

అమ్మానాన్నలను మనము ఎన్నుకోలేము. పుట్టుక ఆ భగవంతుని చేతిలో ఉన్నది. మన జీవితములో ఇతర వ్యక్తులకు చోటివ్వడం మాత్రం మన చేతులలో ఉన్నది. అలాగే మనలను ప్రభావితం చేసే మిత్రులను మనము చాలా జాగ్రత్తగా ఎన్నుకోవడంలో తప్పులేదు. కాని ఎన్నుకున్న తర్వాత, ఆ స్నేహ బంధాన్ని నిజాయితితో కొనసాగించాలి. మిత్రునితో ఎప్పుడూ విశ్వాసంగా ఉండాలి.

రెండేళ్ల మునపు మా కాలేజీ హాస్టలలులో రాత్రివేళల్లో  అందరూ నిద్రిస్తుండగా, నా ఆప్తమిత్రుడొకతను మరియు నేను పలు అంశములపై నాకున్న సందేహాలు మరియు అపోహలు, సామాజిక విషయాలు, సాంకేతికంశాలు ఇంకా మరెన్నో చర్చించేవాలము. స్నేహంపై నాకున్న ఒక సందేహాన్ని తీర్చుతూ “నువ్వు స్నేహం, మొదట ఏవిధంగా చేశావన్నది ముఖ్యం కాదు. కాని, ఆ తరువాత అతనితో ఎంత నిజాయితీతో ప్రవర్తిస్తున్నావన్నది ముఖ్యం” అని నాతో చెప్పిన మటలు, నాకు ఇప్పటికి గుర్తుకుంటున్నది.

ఇదివరకు ఎన్నుకోని మరి స్నేహం చేయడంలో తప్పులేదని చెప్పుకొచ్చాను. మరి మన ఎన్నిక ఏ విధంగా ఉండాలో ఈ శిర్షికలోని మూడవ టపాలో ప్రస్థావిస్తాను.

మీరు మిత్రులను ఎలా ఎన్నుకుంటారు? 1వ భాగం

Read Full Post | Make a Comment ( None so far )

« పాత ఎంట్రీలు

Liked it here?
Why not try sites on the blogroll...

అనుసరించు

Get every new post delivered to your Inbox.

మరో 741గురు చందాదార్లతో చేరండి